સાયખાની સ્કાય ઈન્ટરમિડીયેટ કંપનીમાં જનરેટરમાં બ્લાસ્ટ
(પ્રતિનિધિ) ભરૂચ, વાગરા તાલુકાની સાયખા જીઆઈડીસીમાં આવેલી સ્કાય ઈન્ટરમિડીયેટ કંપનીમાં અચાનક આગ લાગતા દોડધામ મચી ગઈ હતી.આગની જાણ થતાં ફાયર બ્રિગેડના ફાયટરોએ દોડી આવી આગ પર કાબુ મેળવ્યો હતો.
ભરૂચ જીલ્લામાં અનેક ઔદ્યોગિક એકમો આવેલા છે જેમાં છાસવારે આગ લાગવાના બનાવો બનતા રહે છે. રવિવારના રોજ પણ સાંજના સમયે વાગરા તાલુકાની સાયખા જીઆઈડીસીમાં આવેલી સ્કાય ઈન્ટરમિડીયેટ કંપનીના ઉપરના માળે મુકેલા જનરેટરમાં બ્લાસ્ટના કારણે આગ ભભૂકી ઉઠી હતી.
આગના કાળા ભમ્મર ધુમાડાના ગોટે ગોટા દૂર દૂર સુધી નજરે પડતા હતા.આગ લાગવાની જાણ થતાં જ કામદારોમાં દોડધામ મચી ગઈ હતી.આગ અંગેની જાણ ફાયર વિભાગને કરવામાં આવતા તેઓ ફાયર ટેન્ડર સાથે સ્થળ પર દોડી આવી આગ પર કાબુ મેળવ્યો હતો.જોકે સદનસીબે ઘટનામાં કોઈ જાનહાનિ નોંધાઈ ન હતી.પરંતુ કંપનીને મોટુ નુકશાન થયું હોવાનું જણાયું હતું.ઘટનાની જાણ થતાં ઈન્ડસ્ટ્રીયલ સેફટી એન્ડ હેલ્થ વિભાગના અધિકારી પણ સ્થળ પર દોડી આવી તપાસ હાથધરી હતી.
