ગેસના ટેન્કરમાંથી વિદેશી દારૂ ભરેલી ૭૭૦ પેટીઓ સાથે એક આરોપી ઝડપાયોઃ 68 લાખનો મુદ્દામાલ

(તસ્વીરઃ મનોજ મારવાડી, ગોધરા) ગોધરા તાલુકાના ગઢ ગામના મુખ્ય હાઇવે રોડ ઉપરથી ગોધરા એલ.સી.બી.પોલીસની ટીમે વિદેશી દારૂ ભરેલું ટેન્કરને ઝડપી પાડયું હતું. ટેન્કરના અંદર તપાસ કરાતા દારુની પેટીઓ નંગ- ૭૭૦ બોટલો નંગ-૯૨૪૦ કિ.રૂ.૫૮,૧૩,૭૯૬ નો જથ્થો મળી આવ્યો હતો. પોલીસે દારૂનો જથ્થો, ટાટા એલ.પી.જી. ગેસનુ ટેન્કર, તથા મોબાઇલ ફોન, રોકડા રૂપિયા મળી કુલ રૂ. ૬૮,૨૯,૯૯૬ ના મુદ્દામાલ સાથે ટેન્કર ચાલકને પકડી પાડી આગળની કાર્યવાહી હાથ ધરી છે.

પંચમહાલ ગોધરા રેન્જ પોલીસ મહાનિરીક્ષક આર.વી. અસારીએ પોલીસ અધિક્ષક હિમાંશુ સોલંકીને જિલ્લામાં દારૂની અસામાજીક પ્રવૃતિ નેસ્ત નાબુદ કરવા સારૂ જરૂરી સુચના અને માર્ગદર્શન આપ્યું હતું. તે સુચના અને માર્ગદર્શન મુજબ એલ.સી.બી. પી.આઇ.એન.એલ.દેસાઈ, પી.એસ.આઇ. આર.એન.પટેલ તથા સ્ટાફના કર્મચારીઓને પ્રોહીબીશનની હેરાફેરી કરતા ઇસમો ઉપર વોચ રાખી રેઇડો કરવા સુચના આપી હતી.

જે સુચના અન્વયે એલ.સી.બી.ના યોગેશકુમાર સુભાષચંન્દ્રને ખાનગી બાતમીદાર દ્વારા ચોક્કસ બાતમી મળી હતી કે એક ટાટા કંપનીનુ બંધ બોડીનુ એલ.પી.જી. ગેસનુ ટેન્કર( યુ.પી.૮૫.એ.ટી.૮૯૧૨)માં ભારતીય બનાવટનો વિદેશી દારૂનો જથ્થો ભરેલો છે અને તેનો ચાલક દાહોદ તરફથી નીકળી ગોધરા તરફ આવનાર છે.

જે બાતમી આધારે એલ.સી.બી.પોલીસ સ્ટાફે ગઢ ગામની સીમમા દાહોદથી ગોધરા જવાના રોડ પર પટેલ ઢાબા પાસે ખાનગી વોચ રાખી હતી.જે બાતમી મુજબ બાતમી વર્ણન વાળું એલ.પી.જી.ગેસનુ ટેન્કર આવતા તેને પકડી પાડી તપાસ કરતા ડ્રાઇવર કોઈ સંતોષકારક જવાબ આપતો ન હતો.તેમજ ટેન્કર એલ.પી.જી. ગેસનુ હોય તેમાં તપાસ કરવી જોખમ જણાતું હોય ટેન્કરને આગ ન લાગે અને કોઈ મોટો બનાવ ન બને

તે માટે જરૂરી આગ કાબુમાં લેવા માટેના જરૂરી સાધનો સાથે ગોધરા બાયપાસ ઉપર આવેલ લીલેસરા ગામની સીમમાં ખુલ્લી જગ્યામાં ટેન્કર લઈ જઈ ટેન્કરમાં તપાસ કરી હતી. ટેન્કરની નીચેના ભાગે ગેસ ભરવા તેમજ ખાલી કરવા માટેના વાલ્વ ખોલતા અંદરથી એલ.પી.જી. ગેસની વાસ આવતા ધીમે ધીમે ટેન્કરના વાલ્વમાંથી ગેસ વાલ્વ દ્રારા ખાલી કરી ગેસ નીકળતો બંધ થયા

પછી ટેન્કરની પાછળના ભાગે આવેલ પ્રેસર મીટર ખોલી તેના કાણામાંથી જોતા ભારતીય બનાવટનો વિદેશી દારૂ જણાતા દારૂ બહાર કાઢવા માટે ગેસ કટરથી કટીંગ કરવાનુ જરૂરી હોય ગેસ કટર વાળાને બોલાવી ટેન્કરના પાછળના ભાગે પતરુ કટીંગ કરી ટેન્કરમાં ભરેલ વિદેશી દારૂ ગોધરા તાલુકા પોલીસ સ્ટેશનના ઓરવાડા આઉટ પોસ્ટ ઉપર જરૂરી પોલીસ જાપ્તા સાથે લઇ જઇ લાઇટના અજવાળે ટેન્કરમાંથી વિદેશી દારૂની પેટીઓ બહાર કાઢી હતી.

પોલીસે વિદેશી દારૂની અલગ અલગ બ્રાન્ડની પેટીઓ નંગ- ૭૭૦ કિ.રૂ. ૫૮,૧૩,૭૯૬ નો જથ્થો ઝડપી પાડયો હતો. ટેન્કર ચાલક ચંપકલાલ ખેતરામ જાટ (રહે. દેતાણી,ગીરાબ,બાડમેર, રાજસ્થાન) ની ધરપકડ કરી હતી.જ્યારે પોલીસે અનિલ ઉર્ફે પાન્ડીયા જગદીશપ્રસાદ જાટ(રહે. ખાજી કા બાસ, ફતેપુરા, રાજસ્થાન) તથા અન્ય સામે ગુનો નોંધી તપાસ લંબાવી છે. મળેલ રોકડા રૂપિયા મળી કુલ રૂ. ૬૮,૨૯,૯૯૬ ના મુદ્દામાલ સાથે ટેન્કર ચાલકને પકડી પાડી કાયદેસરની કાર્યવાહી કરવામાં આવી હતી.