ડિપ્લોમા ઈજનેરીના પ્રશ્નપત્રમાં ભૂલ બદલ ૧૮ ગુણ સુધીનું ગ્રેસિંગ અપાશે

પેપર સેટરને પરીક્ષાની કામગીરીમાંથી ડિબાર્ડ કરવા ભલામણ.

જીટીયુની ડિપ્લોમા ઈજનેરી સેમેસ્ટર-૨ની પરીક્ષામાં પ્રથમ દિવસે જ મેથ્સના પેપરમાં છબરડો થતાં ભારે હોબાળો થયો
હતો

મુંબઈ,ગુજરાત ટેન્કોલોજીકલ યુનિવર્સિટીની ડિપ્લોમા ઈજનેરી સેમેસ્ટર-૨ની પરીક્ષામાં પ્રથમ દિવસે જ મેથ્સના પેપરમાં છબરડો થતાં ભારે હોબાળો થયો હતો. વિદ્યાર્થીઓ અને કોલેજો દ્વારા થયેલા વિરોધના પગલે GTU દ્વારા એક કમિટીની રચના કરી હતી. આ કમિટીની ગુરૂવારના રોજ મિટીંગ મળી હતી. જેમાં વિદ્યાર્થીઓને ગ્રેસ આપવા તથા પેપર સેટર સામે પગલા સહિતના મુદ્દે ચર્ચા કરવામાં આવી હતી. કમિટી દ્વારા પેપરમાં થયેલા છબરડા બદલ વિદ્યાર્થીઓને ૧૮ ગુણનું ગ્રેસિંગ આપવાની ભલામણ કરવામાં આવી છે. જ્યારે પેપર કાઢનારા સરકારી કોલેજના અધ્યાપકને મહેનતાણું જપ્ત કરવાથી માંડી પરીક્ષાની કામગીરીમાંથી ડિબાર્ડ કરવા સહિતના પગલા લેવા માટે પણ કમિટી દ્વારા યુનિવર્સિટીને ભલામણ કરી છે.

GTUની ડિપ્લોમા ઈજનેરીમાં સેમેસ્ટર-૨ની પરીક્ષા ૨૯ મેથી શરૂ થઈ હતી. પરીક્ષા શરૂ થયાના પ્રથમ દિવસે જ એપ્લાઈડ મેથેમેટિક્સના પેપરમાં છબરડો થયો હતો. પ્રશ્નપત્રમાં લગભગ છથી સાત જેટલા પ્રશ્નોમાં ભુલ હોવાનું જણાતા વિદ્યાર્થીઓ પેપર વખતે મુશ્કેલીમાં મુકાયા હતા. સરકારી પોલીટેકનિક સહિત કેટલીક કોલેજોમાં બપોરે ૧ વાગ્યે પરીક્ષા પૂર્ણ થાય તે પહેલા જ સુધારા માટે જાણ કરાઈ હતી. પરંતુ તમામ વિદ્યાર્થીઓ સુધી આ સુધારો પહોંચ્યો ન હોવાની ફરિયાદ ઉઠવા પામી હતી. બીજી બાજુ વિદ્યાર્થી સંગઠન દ્વારા પણ વિદ્યાર્થીઓને અન્યાય થયા હોવાનું જણાવી વિરોધ વ્યક્ત કરવામાં આવ્યો હતો અને ગ્રેસિંગ આપવા માંગણી કરી હતી.

આમ, ગ્રેસિંગ સહિતના મુદ્દે ભારે વિરોધ થયા બાદ GTU દ્વારા તપાસ માટે ડિપ્લોમા ફેકલ્ટીના ડિન તેમજ બોર્ડ ઓફ સ્ટડીઝના બે મેમ્બર અને બે સબ્જેક્ટ એક્સપર્ટ મળી કુલ પાંચ સભ્યોની એક કમિટીની રચના કરી હતી. આ કમિટીની ગુરૂવારના રોજ મિટીંગ મળી હતી, જેમાં પેપર સેટરને પણ હાજર રાખવામાં આવ્યા હતા. કમિટી દ્વારા તમામ પ્રશ્નો સાથે સંપુર્ણ પ્રશ્નપત્રની ચકાસણી કરવામાં આવી હતી. જેમાં વિવિધ પ્રશ્નોમાં ભુલો હોવાનું કમિટીના ધ્યાને આવ્યું હતું. જેમાં બે પ્રશ્નો ૩-૩ ગુણના, ત્રણ પ્રશ્નો ૪-૪ ગુણના હોવાનું જણાયું હતું. જેથી કમિટી દ્વારા આ પ્રશ્નો માટે ગ્રેસિંગ આપવું જોઈએ તેવી ભલામણ કરી હતી.