27 ફેબ્રુઆરીએ જે સોનાનો 10 ગ્રામનો ભાવ 1.62 લાખ હતો તે આજે ઘટીને 1.38 લાખ થયો

સોના-ચાંદીના ભાવમાં કડાકો: યુદ્ધના ૨૫ દિવસમાં સોનું ૨૩,૦૦૦ અને ચાંદી ૫૮,૦૦૦ રૂપિયા સસ્તી થઈ

નવી દિલ્હી,  મધ્ય પૂર્વમાં અમેરિકા, ઈઝરાયેલ અને ઈરાન વચ્ચે ચાલી રહેલા યુદ્ધને ૨૫ દિવસ વીતી ગયા છે. આ વૈશ્વિક તણાવ વચ્ચે કોમોડિટી માર્કેટમાં અભૂતપૂર્વ હલચલ જોવા મળી રહી છે. આશ્ચર્યજનક રીતે, યુદ્ધના માહોલમાં સુરક્ષિત ગણાતા સોના અને ચાંદીના ભાવ ઉંધા માથે પછડાયા છે. સોનું તેની સર્વોચ્ચ સપાટીથી ૫૪,૦૦૦ રૂપિયા સસ્તું થયું છે, જ્યારે ચાંદીના ભાવમાં તો સીધો અડધો ઘટાડો જોવા મળ્યો છે.

સોનામાં ૨૩,૦૦૦ રૂપિયાનો મોટો ઘટાડો

૨૮ ફેબ્રુઆરીએ યુદ્ધ શરૂ થયું ત્યારથી અત્યાર સુધીમાં મલ્ટી કોમોડિટી એક્સચેન્જ (MCX) પર સોનાના ભાવમાં મોટું ગાબડું પડ્યું છે.

• યુદ્ધ પૂર્વેનો ભાવ: ૨૭ ફેબ્રુઆરીએ ૨૪ કેરેટ સોનાનો ભાવ પ્રતિ ૧૦ ગ્રામ ₹૧,૬૨,૧૦૪ હતો.

• વર્તમાન ભાવ: મંગળવાર (૨૪ માર્ચ) સુધીમાં આ ભાવ ઘટીને ₹૧,૩૮,૭૪૩ થઈ ગયો છે.

• આમ, માત્ર ૨૫ દિવસમાં સોનામાં પ્રતિ ૧૦ ગ્રામ ₹૨૩,૩૬૧ નો ઘટાડો નોંધાયો છે. જો ૨૯ જાન્યુઆરીના રેકોર્ડ હાઈ (₹૧,૯૩,૦૯૬) સાથે સરખામણી કરીએ તો સોનું અત્યારે ₹૫૪,૩૫૩ જેટલું સસ્તું મળી રહ્યું છે.

ચાંદીના ભાવ અડધા થયા: રોકાણકારોમાં ફફડાટ

ચાંદીના ભાવમાં આવેલો ઘટાડો વધુ ચોંકાવનારો છે. ૨૯ જાન્યુઆરીએ ચાંદીના ઇતિહાસમાં પ્રથમવાર ભાવ ૪ લાખ રૂપિયાને પાર કરી ₹૪,૨૦,૦૪૮ની સપાટીએ પહોંચ્યા હતા. હવે તે ભાવ લગભગ અડધો થઈ ગયો છે.

• ૨૫ દિવસનો ઘટાડો: ૨૭ ફેબ્રુઆરીએ જે ચાંદી ₹૨,૮૨,૬૪૪ પ્રતિ કિલો હતી, તે ૨૪ માર્ચ સુધીમાં ઘટીને ₹૨,૨૪,૨૧૦ થઈ ગઈ છે.

• એટલે કે, યુદ્ધ દરમિયાન ચાંદીમાં કિલો દીઠ ₹૫૮,૪૩૪ નો તોતિંગ ઘટાડો થયો છે. ગત સોમવારે તો ચાંદીના ભાવ ૨ લાખની સપાટીની પણ નીચે સરકી ગયા હતા.

કેમ ઘટી રહ્યા છે ભાવ?

નિષ્ણાતોના મતે, યુદ્ધને કારણે વૈશ્વિક બજારોમાં ગભરાટ ફેલાયો છે. રોકાણકારો તેલ અને ગેસની કટોકટી તેમજ શેરબજારની અનિશ્ચિતતા વચ્ચે પોતાની પોઝિશન ખાલી કરી રહ્યા હોય તેવું જણાય છે. યુએસ અને ઇઝરાયેલ દ્વારા ઇરાન પરના હુમલા બાદ સર્જાયેલી આર્થિક સ્થિતિને કારણે કિંમતી ધાતુઓની માંગ પર ભારે અસર પડી છે.