કોંગ્રેસના જ કાર્યકરોએ કોંગ્રેસના ઉમેદવારને લાવી ઉમેદવારી પરત ખેંચાવી
ભરૂચ પાલિકાની ચૂંટણીમાં ફોર્મ ખેંચવાના અંતિમ સમયમાં કોંગી કાર્યકરો અને પોલીસ વચ્ચે બબાલ
(પ્રતિનિધિ) ભરૂચ, ભરૂચ નગરપાલિકાની ચૂંટણી હવે વિવાદોની ચરમસીમાએ પહોંચી છે. આજે ઉમેદવારી ફોર્મ પરત ખેંચવાનો છેલ્લો દિવસ હોય ત્યારે વોર્ડ નંબર ૪ના કોંગ્રેસ ઉમેદવાર મનીષ જાદવે પોતાનું ફોર્મ પરત ખેંચતા રાજકીય માહોલ ગરમાયો હતો.જોકે હવે ભાજપ અને આપ વચ્ચે ચૂંટણી યોજાશે.
ભરૂચ નગરપાલિકાના વોર્ડ નંબર ૪ માં કોંગ્રેસના ઉમેદવાર મનીષ જાદવે ફોર્મ પરત ખેંવાતા આવતા અને કોંગ્રેસના આગેવાનોને અંદર જવા નહી દેતા નેતાઓમાં રોષ ફાટી નીકળ્યો હતો અને સરકારી કચેરીમાં જ ભારે હોબાળો મચાવ્યો હતો.કોંગ્રેસ કાર્યકરો દ્વારા પોલીસ વચ્ચે બોલાચાલી સાથે ખેંચતાણના દ્રશ્યો સર્જાયા હતા જેથી કોંગ્રેસના આગેવાનોએ પોલીસ વિરુદ્ધ હાયહાયના નારા લગાવવામાં આવ્યા હતા.
આ દરમ્યાન પોલીસની હાજરી હોવા છતાં ટેકેદારની જગ્યાએ અન્ય લોકોને પ્રવેશ આપવામાં આવ્યો હોવાના આક્ષેપ સાથે મામલો વધુ બીચકાયો હતો. ઘટનાને પગલે કચેરી પર તણાવપૂર્ણ સ્થિતિ સર્જાઈ હતી.
જોકે બાદમાં ઉમેદવારે પોલીસ પ્રોટેક્શન માંગતા પોલીસે તેને બાઈક પર તેના ઘર સુધી મૂકવા પણ ગઈ હતી. ઉલ્લેખનીય છે કે આજે ઉમેદવારી ફોર્મ પરત ખેંચવાનો હતો જેમાં કોંગ્રેસ પાર્ટીના નગરપાલિકામાં બે ઉમેદવારી પત્ર પાછા ખેંચાતા રાજકીય હલચલ વચ્ચે ભરૂચ પાલિકા ચૂંટણી વધુ ગરમાઈ રહી છે.
