સુશાંત રાજપૂતની યાદમાં અંકિતાએ છોડ વાવ્યા
મુંબઇ: સુશાંત સિંહ રાજપૂતના અધૂરા રહી ગયેલા સપના પૂરા કરવાનું કામ હવે તેની બહેન શ્વેતા સિંહ કીર્તિએ ઉપાડ્યું છે. આ જ કડીમાં શ્વેતા સિંહ કીર્તિએ સુશાંતની યાદમાં કેમ્પેઈન શરૂ કર્યું છે. શ્વેતાના આ પ્રયાસમાં સુશાંત સિંહ રાજપૂતની એક્સ-ગર્લફ્રેન્ડ અને એક્ટ્રેસ અંકિતા લોખંડે પણ જોડાઈ છે. અંકિતાએ સુશાંતની યાદમાં આજે પોતાના ઘરે છોડ વાવ્યા હતા. અંકિતાએ તેના પાલતુ શ્વાન હેચી સાથે છોડ વાવતી કેટલીક તસવીરો પોતાના સોશિયલ મીડિયા અકાઉન્ટ પર શેર કરી છે.
અંકિતાએ પોતાના મુંબઈ સ્થિત ઘરમાં જ કુંડામાં છોડ વાવીને સુશાંતનું સપનું પૂરું કરવા તરફ એક ડગલું વધાર્યું હતું. અંકિતાએ છોડ વાવતી તસવીરો શેર કરીને લખ્યું, “હેચી અને મમ્મા. દરેક બાબતે મારો પાર્ટનર. છોડ વાવીને તેનું સપનું પૂરું કરીને તેને યાદ કરવાની આ અમારી રીત છે. આ કેપ્શન સાથે અંકિતાએ સુશાંતની બહેન શ્વેતા સિંહ કીર્તિ, પોતાના બોયફ્રેન્ડ વિકી જૈન, શ્વેતાના પતિ વિશાલ કીર્તિ અને સુશાંતની ભાણી મલ્લિકા સિંહને ટેગ કર્યા છે.
અગાઉ ૧૨ સપ્ટેમ્બરે સુશાંતની બહેન શ્વેતાએ સોશિયલ મીડિયા પર પોસ્ટ મૂકીને સૌને સુશાંતની યાદમાં છોડ વાવવાની અપીલ કરી હતી. સુશાંતના ૫૦ સપનાના લિસ્ટમાંથી ૧૧મું સપનું હતું ૧૦૦૦ વૃક્ષો ઉગાડવાનું. જેને હવે તેની બહેન આગળ ધપાવી રહી છે. શ્વેતાએ પોસ્ટ મૂકીને લખ્યું હતું, આવતીકાલે કેમ્પેઈન છે તે ભૂલતા નહીં. આપણા વહાલા સુશાંત માટે તમને છોડ વાવતા જોવા માટે ઉત્સુક છું. આપણા વહાલા સ્ટારના સપના પૂરા કરીને તેને યાદ કરવો સૌથી સારો વિકલ્પ છે.
