સિનિયર સિટીઝનને ૧૪ દિવસ ડિજિટલ અરેસ્ટ કરીને રૂ.ર.ર૭ કરોડ પડાવી લેનાર ૪ ઝડપાયા

અમદાવાદ, વડોદરાના સિનિયર સિટીઝનને ૧૪ દિવસ સુધી ડિજિટલ અરેસ્ટ રાખીને રૂ.ર.ર૭ કરોડ ખંખેરી લેવાના ચકચારી કિસ્સામાં ગાંધીનગર સાયબર સેન્ટર ઓફ એકસેલન્સની ટીમે આરોપી ભૂપેન્દ્ર સરકાર (ઉ.વ.૪ર) રહે. પં.બંગાળ, શુભમ સિંગલા (ઉ.વ.૩ર, રહે. અંબાલા, હરિયાણા), સંજયકુમાર સિંધ (ઉ.વ.૩૪, રહે. કૌમુર, બિહાર) અને સોનુકુમાર (ઉ.વ.ર૮ રહે. કૌમુર, બિહાર)ની ધરપકડ કરી છે. પોલીસની પ્રાથમિક પુછપરછમાં જાણવા મળ્યું છે કે,

ચારેય આરોપીઓ ટેલિકોમ રેગ્યુલેટરી ઓથોરિટી ઓફ ઈન્ડિયા, મુંબઈ ક્રાઈમ બ્રાંચના આઈપીએસ ઓફિસર તરીકેની ખોટી ઓળખ વૃદ્ધને આપી હતી અને તમારો મોબાઈલ નંબર અને આધાર કાર્ડ મની લોન્ડરિંગ જેવા ગંભીર ગુનામાં ઉપયોગમાં લેવામાં આવ્યો છે તેમ કહીને વૃદ્ધને સતત ૧૪ દિવસ ડિજિટલ એરેસ્ટ રાખી ટુકડે ટુકડે રૂ.ર.ર૭ કરોડ અલગ અલગ ખાતામાં ટ્રાન્સફર કરાવીને ઠગાઈ આચરી હતી.

વડોદરામાં રહેતા અને આર્થિક સદ્ધરતા ધરાવતા ૭પ વર્ષીય વૃદ્ધ ગત ફેબ્રુઆરી મહિનામાં ડિજિટલ એરેસ્ટનો શિકાર બની રૂ.ર.ર૭ કરોડ ગુમાવતા પરિવારના તમામ સભ્યો ઘેરા શોકમાં સરી પડ્યા હતા.

આ મામલે વૃદ્ધે પરિવારની મદદથી સાયબર હેલ્પ લાઈનમાં જાણ કર્યા બાદ આ અંગેની સત્તાવાર ફરિયાદ ગાંધીનગર સાયબર સેન્ટર ઓફ એકસેલન્સ સેન્ટરમાં નોંધાવી હતી. આ મામલે ડીઆઈજી બિપીન આહિરેની સૂચના મુજબ, એસપી રાજદીપસિંહ ઝાલાએ અલગ અલગ ત્રણ ટીમ બનાવી કેસની ઝીણવટપૂર્વક ટેકનિકલ તપાસ શરૂ કરી ત્યારે જાણવા મળ્યું કે,

૯૧ લાખ રૂપિયા બિહારથી અને ૧.૩૭ કરોડ રૂપિયા હરિયાણાના અંબાલામાંથી વિડ્રો થયા હતા. બાકીના તમામ રૂપિયા અલગ અલગ ખાતાઓમાં જમા કરાવ્યા હતા. શરૂઆતના જે ચાર બેંક એકાઉન્ટમાં રૂપિયા જમા થયા હતા તે તમામ આરોપીઓ અને તેમના એકાઉન્ટ ગુજરાત બહારના હોવાનું તપાસમાં સામે આવતા જ ચારેય આરોપીઓની ધરપકડ કરાઈ છે.