ઉદ્યોગભવનઃ આસી. ઈલેક્ટ્રીકલ ઈન્સપેક્ટર 50 હજારની લાંચ લેતા ઝડપાયા
ગાંધીનગરમાં એ.સી.બી.ની સફળ ટ્રેપ
(પ્રતિનિધિ)અમદાવાદ, એન્ટી કરપ્શન બ્યુરો ગુજરાત દ્વારા ગાંધીનગરમાં વધુ એક સફળ ટ્રેપ ગોઠવી સરકારી કચેરીમાં ચાલતા ભ્રષ્ટાચાર સામે કાર્યવાહી કરવામાં આવી છે. ઉદ્યોગ ભવન, ગાંધીનગર ખાતે ફરજ બજાવતા આસીસ્ટન્ટ ઈલેક્ટ્રીકલ ઈન્સપેક્ટર મનિષકુમાર નવીનચંદ્ર રાવલને રૂ. ૫૦ હજારની લાંચ સ્વીકારતા રંગેહાથ ઝડપી લેવામાં આવ્યા છે.
એ.સી.બી. પાસેથી પ્રાપ્ત વિગતો મુજબ, ફરીયાદી બાંધકામ પ્રોજેક્ટોમાં પેસિવ ફાયર સિસ્ટમનું કામ કરે છે. આ કામમાં પેસિવ ફાયર સિસ્ટમના પ્રમાણપત્રોને માન્ય રાખવા અને એન.ઓ.સી. સંબંધિત પ્રક્રિયા માટે આરોપી અધિકારીએ કુલ રૂ. ૫ લાખની લાંચની માંગણી કરી હતી. ફરીયાદી લાંચ આપવા માંગતા ન હોવાથી તેમણે એ.સી.બી.નો સંપર્ક કરી સત્તાવાર ફરીયાદ નોંધાવી હતી. ત્યારબાદ એ.સી.બી.એ આયોજનબદ્ધ રીતે ટ્રેપ ગોઠવ્યો હતો.
ઉધોગ ભવન, ગાંધીનગર ખાતે ફરજ બજાવતા આસીસ્ટન્ટ ઇલેકટ્રીકલ ઇન્સ્પેકટર મનિષકુમાર નવિનચન્દ્ર રાવલ રૂ.૫૦,૦૦૦/- ની લાંચ લેતા ઝડપાયા.@sanghaviharsh @PIYUSH_270871 @DeepakMeghani@InfoGujarat @HARESHM38109376@BaldevD11469478 #ACBGujarat #FightAgainstCorruption pic.twitter.com/HJqI8MDLlY
— ACB Gujarat (@ACBGujarat) May 18, 2026
ટ્રેપ દરમિયાન આરોપી મનિષકુમાર રાવલે ફરીયાદી સાથે હેતુલક્ષી વાતચીત કરી લાંચ પેટે રૂ. ૫૦ હજારની રકમ સ્વીકારી હતી. તે જ સમયે એ.સી.બી.ની ટીમે કાર્યવાહી કરી આરોપીને ઝડપી લીધો હતો.
આ ટ્રેપ ગાંધીનગરના ઘ-૨ સર્કલ નજીક પટેલ આઈસ્ક્રીમ પાસે, ૧૦૨ એ.એમ.ટી.એસ. બસસ્ટેન્ડ આગળ જાહેર રોડ ઉપર ગોઠવવામાં આવ્યો હતો. એ.સી.બી.એ આરોપી પાસેથી સ્વીકારેલ રૂ. ૫૦ હજારની લાંચની રકમ પણ કબજે કરી છે. આ સમગ્ર કામગીરી અમદાવાદ શહેર એ.સી.બી. પોલીસ સ્ટેશનના પોલીસ ઇન્સ્પેક્ટર શ્રી ડી.બી. વાળાના માર્ગદર્શન હેઠળ હાથ ધરવામાં આવી હતી.
ટ્રેપ દરમિયાન એ.સી.બી. અમદાવાદ એકમના મદદનીશ નિયામક શ્રી એમ.એચ. પુવાર દ્વારા સુપરવિઝન કરવામાં આવ્યું હતું, જ્યારે નાયબ નિયામક શ્રી હરેશ મેવાડા ઇન્ચાર્જ અધિકારી તરીકે જોડાયા હતા. સરકારી કચેરીઓમાં કામકાજ માટે લાંચ માગવાની ઘટનાઓ સતત સામે આવી રહી છે.
