દસક્રોઈમાં ફેકટરી માલિક પાસેથી લાંચ લેતા ASI-GRD ઝડપાયા

(એજન્સી)અમદાવાદ, દસક્રોઈમાં આવેલી કોસ્મેટીક વસ્તુની ફેકટરીના માલિકને એકસ્પાયર ડેટની વસ્તુઓ વેચતા હોવાનું કહી કાર્યવાહી કરવાની ધમકી આપી બે લાખ માગતા એસીબીની ટીમે કણભા પોલીસ સ્ટેશનની બાકરોલ પોલીસ ચોકી પાસે ફરીયાદીની કારમાં ટ્રેપ ગોઠવી કણખાના એએસઆઈ ભાવેશ લાભશંકર રાવલ અને જીઆરડી જવાન કમલેશ ઉર્ફે રોબર્ટ વિનોદભાઈ બારોટને રૂ.૩૦ હજારની લાંચ લેતા ઝડપી લીધા હતા.

દસક્રોઈ તાલુકાના ધામતવાણ વિસ્તારમાં કોસ્મેટીક ચીજવસ્તુઓના ઉત્પાદનની ફેકટરી ધરાવતા ફરીયાદીના ત્યાં આરોપીઓ ગત તા.૧૪મીના રોજ ગયા હતા. એએસઆઈ ભાવેશ સહીત ચાર લોકોએ સ્થળ પર જઈ ફરીયાદીને ફેકટરીના માલસામાન પર નવી તારીખ છાપી એકસપાયરી ડેટનો સામાન કેમ વેચો છો !

તેમ કહી કેસ કરી જેલમાં પુરી દેવાની ધમકી આપી હતી. કેસ ન કરવા માટે બે લાખની માંગણી આરોપીઓ કરી રકઝકના અંતે રૂ.૩૦ હજાર લેવા માટે આરોપીઓ તૈયાર થયા હતા. બીજા દિવસે સાંજે રણજીત સોલંકી ફરીયાદીને રોબર્ટભાઈએ પૈસા માટે મોકલ્યાનું જણાવ્યું હતું.

ફરીયાદીએ ફોન પર સંપર્ક કરી રૂબરૂ પૈસા આપી જશે તેમ જણાવ્યું હતુ. બનાવને પગલે પૈસા આપવા ન માંગતા ફેકટરી માલીકે એસીબીના ટોલ ફ્રી નંબર પર સંપર્ક કરતા ટ્રેપનું આયોજન કરાયું હતું. જે ટ્રેપ દરમ્યાન એએસઆઈ ભાવેશ અને જીઆરડી જવાન રોબર્ટની ધરપકડ કરાઈ હતી.