અમેરિકા ભારતને અનલિમિટેડ ક્રૂડ ઓઈલ આપવા માટે તૈયાર

અમેરિકાના વિદેશમંત્રી માર્કો રુબિયોની જાહેરાત

વોશિંગ્ટન, મિડલ ઈસ્ટ (પશ્ચિમ એશિયા) માં ચાલી રહેલી ભીષણ સૈન્ય કટોકટી અને હોર્મુઝની ખાડીમાં સર્જાયેલી નાકાબંધી વચ્ચે ભારત માટે વૈશ્વિક સ્તરેથી એક ખૂબ જ રાહત સમાન અને મોટા સમાચાર સામે આવ્યા છે.

પોતાના ચાર દિવસીય ભારત પ્રવાસ પર આવતા પહેલા અમેરિકાના વિદેશ મંત્રી માર્કો રુબિયોએ નવી દિલ્હીને અસીમિત એનર્જી (ઓઇલ અને ગેસ) આપવાની મોટી જાહેરાત કરી છે.

પોતાના સત્તાવાર ભારત પ્રવાસના બરાબર એક દિવસ પહેલાં મિયામી ખાતે પત્રકારો સાથે વાતચીત કરતી વખતે અમેરિકાના વિદેશ મંત્રી માર્કો રુબિયોએ ભારત સાથેના સંબંધોને સર્વોચ્ચ ગણાવ્યા છે. રુબિયોએ સ્પષ્ટ શબ્દોમાં ખાતરી આપી છે કે, “વોશિંગ્ટન ભારતને એટલી ઉર્જા (ઓઇલ અને ગેસ) વેચવા માટે સંપૂર્ણ તૈયાર છે, જેટલી નવી દિલ્હી અમારી પાસેથી ખરીદવાની ઈચ્છા રાખે છે.” તેમણે ભારતને અમેરિકાનો એક બહેતરીન અને અત્યંત મજબૂત ભાગીદાર ગણાવ્યો હતો.

વિદેશ મંત્રી રુબિયોએ આ દરમિયાન વધુ એક મહત્ત્વની આર્થિક જાહેરાત કરતા જણાવ્યું કે, વેનેઝુએલાના અંતરિમ રાષ્ટ્રપતિ ડેલ્સી રોડ્રિગેઝ પણ આગામી સપ્તાહે ભારતની મુલાકાતે આવી રહ્યા છે, જ્યાં ભારતને કાચું તેલ વેચવાના મુદ્દે આખરી મહોર વાગશે. અત્રે ઉલ્લેખનીય છે કે, ચાલુ વર્ષે (૨૦૨૬ માં) ફેબ્રુઆરીની શરૂઆતમાં જ અમેરિકન રાષ્ટ્રપ્રમુખ ડોનાલ્ડ ટ્રમ્પે ભારત દ્વારા વેનેઝુએલાથી તેલ ખરીદવાની પ્રક્રિયાને લીલી ઝંડી આપી હતી

અને ભારત માટે ટેરિફ રેટ ૨૫ ટકાથી ઘટાડીને ૧૮ ટકા કરવાનો ઐતિહાસિક વેપાર કરાર કર્યો હતો. મિડલ ઈસ્ટના યુદ્ધ વચ્ચે અમેરિકા અને વેનેઝુએલાના આ સપ્લાય ઓપ્શનથી ભારતમાં પેટ્રોલ-ડીઝલની અછતનો ખતરો ટળી જશે.

અમેરિકાના વિદેશ મંત્રી ૨૩ મે થી ૨૬ મે સુધી ભારતના પ્રવાસે રહેશે. આ ૪ દિવસ દરમિયાન તેઓ નવી દિલ્હી ઉપરાંત કોલકાતા, આગ્રા અને જયપુરની મુલાકાત લેશે. રાજદ્વારી દ્રષ્ટિએ રસપ્રદ વાત એ છે કે, છેલ્લા ૧૪ વર્ષમાં કોલકાતાની મુલાકાત લેનારા માર્કો રુબિયો પ્રથમ અમેરિકી વિદેશ મંત્રી બનશે.