જમ્મુમાં પૂર્વ મુખ્યમંત્રી ફારૂક અબ્દુલ્લા પર ફાયરિંગનો પ્રયાસ

જમ્મુ-કાશ્મીર, જમ્મુ-કાશ્મીરના પૂર્વ મુખ્યમંત્રી ફારૂક અબ્દુલ્લા પર ગઈકાલે મોડી રાત્રે એક લગ્ન સમારોહ દરમિયાન જીવલેણ હુમલો થયો હતો. સુરક્ષાકર્મીઓની સતર્કતાને કારણે ફારૂક અબ્દુલ્લાનો આબાદ બચાવ થયો છે, જ્યારે હુમલાખોર પોલીસના સકંજામાં છે.

જમ્મુના ગ્રેટર કૈલાશ વિસ્તારમાં આવેલા રોયલ પાર્કમાં નેશનલ કોન્ફરન્સના લીગલ સેલના પ્રમુખની પુત્રીના લગ્ન હતા. આ પ્રસંગે ફારૂક અબ્દુલ્લા અને ડેપ્યુટી સીએમ સુરિંદર ચૌધરી હાજર હતા. જ્યારે ફારૂક અબ્દુલ્લા વિદાય લઈ રહ્યા હતા, ત્યારે અચાનક એક શખ્સે પાછળથી આવીને રિવોલ્વર તાણી દીધી હતી.

સુરક્ષાકર્મીઓએ તરત જ હુમલાખોરનો હાથ ઝટકી દેતા ગોળી હવામાં ચાલી ગઈ હતી.પોલીસે ધરપકડ કરેલા હુમલાખોરનું નામ કમલ સિંહ જામવાલ છે, જે જમ્મુના જૂની મંડી વિસ્તારનો રહેવાસી છે. ૧૯૬૩માં જન્મેલા કમલ સિંહની જૂના શહેરમાં ઘણી દુકાનો છે અને તે ભાડાની આવક પર જીવે છે. હુમલામાં વપરાયેલી બંદૂક તેની પોતાની હોવાનું બહાર આવ્યું છે.

પોલીસ પૂછપરછમાં કમલ સિંહે અત્યંત ચોંકાવનારો સ્વીકાર કર્યાે છે. તેણે પોલીસને જણાવ્યું કે, “હું ૨૦ વર્ષથી ફારૂક અબ્દુલ્લાને મારવા માંગતો હતો. આ મારો વ્યક્તિગત એજન્ડા હતો.” આ નિવેદન બાદ સુરક્ષા એજન્સીઓ તપાસ કરી રહી છે કે શું આ પાછળ કોઈ ઊંડું ષડયંત્ર છે કે પછી આ કોઈ માનસિક વિકૃતિનું પરિણામ છે.પુત્ર અને જમ્મુ-કાશ્મીરના સીએમ ઉમર અબ્દુલ્લાએ આ ઘટના પર ચિંતા વ્યક્ત કરતા કહ્યું કે, “અલ્લાહ રહેમદિલ છે, મારા પિતા આબાદ બચ્યા છે.

પરંતુ સૌથી મોટો સવાલ એ છે કે સુરક્ષા હોવા છતાં કોઈ વ્યક્તિ આટલી નજીક પિસ્તોલ લઈને કેવી રીતે પહોંચી શકે?” આ ઘટનાને સુરક્ષામાં મોટી ચૂક માનવામાં આવી રહી છે.SS1MS