ઇન્સ્ટાગ્રામમાં આવશે મોટો બદલાવ: હવે પૈસા આપીને મેળવી શકાશે ‘સિક્રેટ વ્યૂ’ સહિતના આ ફીચર્સ!

નવી દિલ્હી: જો તમે ઇન્સ્ટાગ્રામ પર પ્રાઇવસી અને વધારાના કંટ્રોલના શોખીન છો, તો મેટા તમારા માટે એક ખાસ ભેટ લઈને આવી રહ્યું છે. કંપની હવે ‘મેટા વેરિફાઇડ’ (બ્લુ ટિક) સિવાય સામાન્ય યુઝર્સ માટે પણ એક પ્રીમિયમ સેવા ‘ઇન્સ્ટાગ્રામ પ્લસ’ પર કામ કરી રહી છે. આ સર્વિસમાં એવા ફીચર્સ આપવામાં આવશે જેની યુઝર્સ લાંબા સમયથી રાહ જોઈ રહ્યા હતા.

ઇન્સ્ટાગ્રામ પ્લસનું સૌથી આકર્ષક ફીચર એનોનિમસ સ્ટોરી વ્યૂ (Anonymous Story View) છે. અત્યાર સુધી જ્યારે તમે કોઈની સ્ટોરી જોતા, ત્યારે તમારું નામ સામેવાળાના વ્યુઅર લિસ્ટમાં દેખાતું હતું. પરંતુ આ પેઇડ સર્વિસ લીધા પછી, તમે કોઈની પણ સ્ટોરી તેની જાણ બહાર (સિક્રેટલી) જોઈ શકશો. તમારું નામ વ્યુઅર લિસ્ટમાં સામેલ થશે નહીં.

સામાન્ય રીતે ઇન્સ્ટાગ્રામ સ્ટોરી ૨૪ કલાકમાં ગાયબ થઈ જાય છે. પરંતુ ઇન્સ્ટાગ્રામ પ્લસના યુઝર્સ પોતાની સ્ટોરીને વધારાના ૨૪ કલાક (કુલ ૪૮ કલાક) માટે એક્ટિવ રાખી શકશે. આ ઉપરાંત, અઠવાડિયામાં એક સ્ટોરીને ‘સ્પોટલાઇટ’ પણ કરી શકાશે, જે તમારા ફોલોઅર્સના ફીડમાં સૌથી આગળ દેખાશે.

મલ્ટીપલ ક્લોઝ ફ્રેન્ડ્સ લિસ્ટ અને એડવાન્સ એનાલિટિક્સ

• કસ્ટમ ઓડિયન્સ લિસ્ટ: અત્યાર સુધી માત્ર એક જ ‘ક્લોઝ ફ્રેન્ડ્સ’ લિસ્ટ બનાવી શકાતું હતું. હવે યુઝર્સ અલગ-અલગ ગ્રુપ (જેમ કે ફેમિલી, ઓફિસ ફ્રેન્ડ્સ, કોલેજ ફ્રેન્ડ્સ) માટે અલગ-અલગ લિસ્ટ બનાવી શકશે અને નક્કી કરી શકશે કે કઈ સ્ટોરી કોને બતાવવી.

• રી-વોચ કાઉન્ટ: તમને એ પણ જાણવા મળશે કે તમારી સ્ટોરી કોણે કેટલી વાર ફરીથી (Rewatch) જોઈ છે. આ ફીચર ખાસ કરીને કન્ટેન્ટ ક્રિએટર્સ માટે ખૂબ ઉપયોગી સાબિત થશે.

• સુપર લાઈક્સ: સ્ટોરી પર રિએક્શન આપવા માટે ખાસ એનિમેટેડ ‘સુપર લાઈક્સ’ (Superlikes) નું ઓપ્શન મળશે, જે સામાન્ય લાઈક કરતા અલગ અને આકર્ષક હશે.

ક્યાં ચાલી રહ્યું છે ટેસ્ટિંગ?

મેટા હાલમાં આ સુવિધાઓનું પરીક્ષણ જાપાન, મેક્સિકો અને ફિલિપાઈન્સ જેવા દેશોમાં કરી રહ્યું છે. અહેવાલો અનુસાર, આ સર્વિસની કિંમત મહિને અંદાજે $1 થી $2 (આશરે ₹80 થી ₹170) ની વચ્ચે હોઈ શકે છે. જોકે, ભારતમાં તેની કિંમત અને લોન્ચિંગ તારીખ અંગે હજુ સુધી કોઈ સત્તાવાર જાહેરાત કરવામાં આવી નથી.

નિષ્ણાંતોનું શું કહેવું છે? સોશિયલ મીડિયા એક્સપર્ટ્સ માને છે કે મેટા હવે એડવર્ટાઈઝમેન્ટ સિવાય સીધી આવક મેળવવા માટે આ મોડેલ પર ધ્યાન આપી રહ્યું છે. આ ફીચર્સ એવા યુઝર્સને આકર્ષશે જેઓ પોતાની ઓનલાઈન એક્ટિવિટીને વધુ ખાનગી રાખવા માંગે છે અથવા પોતાના કન્ટેન્ટ પર વધુ કંટ્રોલ ઈચ્છે છે.