બે સ્વર્ગસ્થ મુખ્ય શિક્ષકોના પરિવારોને ૨૦ લાખની સહાયના ડ્રાફ્ટ અર્પણ કરાયા
(પ્રતિનિધિ) મોડાસા, વિજયનગર તાલુકામાં જુદી જુદી પ્રાથમિક શાળાઓમાં ફરજ બજાવતા અને સેવા દરમિયાન અવસાન પામેલા બે મુખ્ય શિક્ષકોના વારસદારોને આર્થિક ટેકો પૂરો પાડવાના આશય સાથે કુલ ૨૦ લાખ રૂપિયાની ઉચ્ચક નાણાકીય સહાયના ડ્રાફ્ટ અર્પણ કરવામાં આવ્યા હતા.
જેમાં પડલાઈ પ્રાથમિક શાળાના પૂર્વ મુખ્ય શિક્ષક સ્વ. કાંતિલાલ એસ. ગોધાના પત્ની બિંદિયાબેન કાંતિલાલ ગોધાને રૂપિયા ૬,૦૦,૦૦૦ (અંકે રૂપિયા છ લાખ) અને ઓલાના મહુડા પ્રાથમિક શાળાના પૂર્વ મુખ્ય શિક્ષક સ્વ. જીતેન્દ્રભાઈ સુકાજી ડામોરના પત્ની કોકિલાબેનને રૂપિયા ૧૪,૦૦,૦૦૦ની ઉચ્ચક નાણાકીય મૃત્યુ સહાયનો ડ્રાફ્ટ એનાયત કરવામાં આવ્યો હતો.
આ બંને પરિવારોને મળી કુલ ૨૦ લાખ રૂપિયાની સહાયના બે જુદા જુદા ડ્રાફ્ટ તાલુકા પ્રાથમિક શિક્ષણાધિકારી શ્રી પી.પી. ચૌહાણના હસ્તે અર્પણ કરી સામાજિક સુરક્ષાનો અહેસાસ કરાવવામાં આવ્યો હતો.
આ પ્રસંગે તાલુકા પ્રાથમિક શિક્ષક સંઘના પ્રમુખ મહેન્દ્રભાઈ એસ. નિનામા, મહામંત્રી કે.બી. પંચાલ, ઉપપ્રમુખ ચંદુભાઈ એ. ડામોર તેમજ સહમંત્રી કમલેશભાઈ કે. પરમાર વિશેષ ઉપસ્થિત રહ્યા હતા. આ ઉપરાંત શિક્ષક સંઘના વિવિધ હોદ્દેદારો અને ‘ધી તાલુકા પ્રાથમિક શિક્ષક શરાફી મંડળી’ના ચેરમેન કાળુભાઈ એમ. પટેલની પ્રેરક ઉપસ્થિતિમાં આ કાર્યક્રમ યોજાયો હતો.
શિક્ષક પરિવારો પર આવી પડેલી આફતના સમયે શિક્ષક સંઘ અને શરાફી મંડળી દ્વારા કરવામાં આવેલી આ કામગીરીને શિક્ષણ જગતમાં બિરદાવવામાં આવી હતી.
