Western Times News

Latest News from Gujarat India

રાજ્યની IT/ITES પોલિસી 2022-27ને મળી રહેલો વ્યાપક રોકાણ પ્રતિસાદ

ગુજરાતમાં IT/ITES સેકટરમાં રોકાણોને પ્રોત્સાહનથી રોજગાર નિર્માણ તકો વધારવા મુખ્યમંત્રી શ્રી ભૂપેન્દ્ર પટેલની પ્રેરક ઉપસ્થિતીમાં વધુ બે MoU થયા

GESIA એસોસિયેશન રૂ. ર૦૦૦ કરોડનું રોકાણ આગામી પાંચ વર્ષમાં કરશે-અંદાજે ૬૭૦૦ લોકોને રોજગાર અવસર મળશે-ઇન્ટીગ્રીટી ગૃપ રૂ. ૧૦૦ થી ૧પ૦ કરોડનું રોકાણ કરીને ૩ હજાર જેટલી રોજગારીની તકો પૂરી પાડશે 

મુખ્યમંત્રી શ્રી ભૂપેન્દ્ર પટેલના નેતૃત્વમાં રાજ્ય સરકારે આઇ.ટી અને આઇ.ટી.ઇ.એસ સેક્ટરમાં રોકાણો તેમજ રોજગાર નિર્માણને વેગ આપવા ઘડેલી IT/ITES પોલિસી ર૦રર-ર૭ ને રોકાણકારોનો વ્યાપક પ્રતિસાદ મળ્યો છે.

આ બેય ક્ષેત્રોના પ્રતિષ્ઠિત ઉદ્યોગ-રોકાણકારો, કંપની સંચાલકો ગુજરાતની આ પોલિસીના પ્રોત્સાહક લાભથી પ્રેરિત થઇ રાજ્યમાં રોકાણો માટે આવતા થયા છે.

મુખ્યમંત્રી શ્રી ભૂપેન્દ્ર પટેલની ઉપસ્થિતીમાં ગાંધીનગરમાં વધુ બે MoUસોમવારે તા.ર૦ મી જૂને સંપન્ન થયા હતા. સાયન્સ ટેકનોલોજી  મંત્રીશ્રી જીતુભાઈ વાઘાણી આ અવસરે સહભાગી થયા હતા.

રાજ્ય સરકારના સાયન્સ ટેકનોલોજી વિભાગ અને GESIA આઇ.ટી એસોસિયેશન વચ્ચે સમજૂતિ કરાર થયા હતા.

આ એસોસિયેશનની વિવિધ ૧૦ જેટલી કંપનીઓ કુલ રૂ. ર હજાર કરોડનું રોકાણ આગામી પાંચ વર્ષમાં IT ક્ષેત્રે કરવાની છે અને તેના દ્વારા અંદાજે ૬૭પ૦ લોકોને રોજગારીની વિવિધ તકો મળશે.

GESIA રાજ્યમાં લીઝ, કોમર્શીયલ ઓફિસ સ્પેસ, આઇ.ટી સોફટવેર એન્ડ ઇન્ફ્રાસ્ટ્રકચર, માનવ સંશાધન, ડેટા સેન્ટર, આર એન્ડ ડી, કલાઉડ વગેરે વિષયોમાં પોતાની સેવાઓ આપશે.

આ MoUઉપરાંત અમદાવાદ સ્થિત ઇન્ટીગ્રીટી ગૃપ જે લીડીંગ આઉટ સોર્સીંગ અને ફિનટેક કંપની છે તેમણે પણ રાજ્ય સરકારના સાયન્સ ટેક્નોલોજી ડિપાર્ટમેન્ટ સાથે MoUકર્યા હતા.

ઇન્ટીગ્રીટી ગૃપ ર૦૧પ-૧૬ થી આ ક્ષેત્રે કાર્યરત છે અને યુ.એસ, યુ.કે સહિતના ગ્લોબલ માર્કેટમાં ખ્યાતિ ધરાવે છે. ભારતમાં પણ પાંચ શહેરોમાં ઓફિસ સાથે ૧રપ૦ કર્મચારીઓની સંખ્યા ધરાવે છે.

હવે, ગુજરાત સરકાર સાથે આઇ.ટી, આઇ.ટી.ઇ.એસ પોલિસી-ર૦રર-૨૭ થી પ્રેરિત થઇને ઇન્ટીગ્રીટી ગૃપે જે MoUકર્યા છે તે અનુસાર આગામી ૩ થી પાંચ વર્ષમાં તેઓ રૂ. ૧૦૦ થી ૧પ૦ કરોડનું રોકાણ કરશે તથા ૩ હજાર જેટલા લોકોને રોજગારીના અવસર પૂરા પાડશે.

મુખ્યમંત્રી શ્રી ભૂપેન્દ્ર પટેલની ઉપસ્થિતીમાં આ MoUપર GESIA વતી વાઇસ ચેરમેન એન્ડ ડિરેકટર પ્રણવ પંડયા તેમજ ઇન્ટીગ્રીટી ગૃપ વતી સી.ઇ.ઓ શાલિન પરીખે તથા રાજ્ય સરકાર વતી સાયન્સ ટેક્નોલોજી સચિવ શ્રી વિજય નહેરાએ હસ્તાક્ષર કર્યા હતા.

આ અવસરે મુખ્યમંત્રીશ્રીના મુખ્ય અગ્ર સચિવ શ્રી કૈલાસનાથન,મુખ્યસચિવશ્રી પંકજ કુમાર, અધિક મુખ્ય સચિવ શ્રી પંકજ જોષી,શ્રી સચિન ગુસિયા વગેરે ઉપસ્થિત રહ્યા હતા.

Copyright © All rights reserved. | Developed by Aneri Developers