સુરત એરપોર્ટ પર બેંગ્કોકથી લવાયેલો ૬.પ કરોડનો હાઈબ્રીડ ગાંજો ઝડપાયો

સુરત, હીરાનગરી સુરતનું આંતરરાષ્ટ્રીય એરપોર્ટ હવે દાણચોરો માટે હોટસ્પોટ બની રહ્યું છે. સુરત એરપોર્ટ કસ્ટમ્સ વિભાગે બુધવારે રાત્રે એક મોટી કાર્યવાહી કરતા બેંગ્કોકથી આવેલા બે જયપુરના મુસાફરો પાસેથી કરોડની કિંમતનો ઉચ્ચ ગુણવત્તાનો ૬.પ કરોડનો ૬.૪ કિલો હાઈબ્રિડ ગાંજો જપ્ત કર્યો છે. આ મામલે કસ્ટમ્સ વિભાગે બન્ને યુવકોની ધરપકડ કરી કાયદેસરની કાર્યવાહી હાથ ધરી છે.

કસ્ટમ વિભાગ પાસેથી મળતી માહિતી મુજબ ૧૮ ફેબ્રુઆરીના રોજ રાત્રે બેંગ્કોકથી સુરત આવેલી એર ઈન્ડિયા એરસપ્રેસની ફલાઈટ નંબર આઈએસ-ર૬૩ના મુસાફરોનું કસ્ટમ્સ અધિકારીઓ દ્વારા રૂટિન ચેકિંગ અને પ્રોફાઈલિંગ કરવામાં આવી રહ્યું હતું.

આ દરમિયાન જયપુરના બે પુરૂષ મુસાફરોની હિલચાલ શંકાસ્પદ જણાતા તેમને અટકાવી આકરી પૂછપરછ કરવામાં આવી હતી જ્યારે આ મુસાફરોએ ચેક-ઈન કરેલા સામાનની તપાસ કરવામાં આવી ત્યારે અધિકારીઓ પણ ચોંકી ઉઠયા હતા.

સામાનની અંદર ખૂબ જ સાવચેતીપૂર્વક છૂપાવેલા ૩૦ વેકયુમ-પેકડ પારદર્શક પોલિથિન પેકેટ્‌સ મળી આવ્યાહતા. આ પેકેટ્‌સમાં લીલા પાંદડા જેવો પદાર્થ ભરેલો હતો કુલ આશરે ૬.૪ કિલો અને વેકયુમ સિલ્ડ પેકેટ હતા તેને વેકયુમ પેક એટલા માટે કરવામાં આવ્યા હતા કેમ કે ગાંજાની ગંધ બહાર ન આવે. ડ્રગ ડિટેકશન કીટ દ્વારા તપાસ કરતા આ પદાર્થ હાઈબ્રિડ ગાંજો હોવાની પૃષ્ટિ થઈ હતી જેની બજાર કિંમત અંદાજિત ૬.પ કરોડ જેટલી થાય છે.

આટલી મોટી માત્રામાં માદક દ્રવ્યો મળી આવતા કસ્ટમ્સ વિભાગે એનડીપીએસ એકટ ૧૯૮પની વિવિધ કલમો હેઠળ પ્રતિબંધિત ગાંજો જપ્ત કર્યો છે. આ ગુનામાં સંડોવાયેલા બન્ને મુસાફરોની સ્થળ પર જ ધરપકડ કરવામાં આવી છે.

હાલમાં કસ્ટમ્સ અને સુરક્ષા એજન્સીઓ એ તપાસ કરી રહી છે કે આ ગાંજો સુરતમાં કોને પહોંચાડવાનો હતો ? ઉલ્લેખનીય છે કે, સુરત એરપોર્ટ પર છેલ્લા કેટલાક સમયથી નશીલા પદાર્થોની હેરફેરી રોકવા માટે કસ્ટમ્સ વિભાગ વધુ એલર્ટ બન્યું છે તેમ એક જ પખવાડિયામાં આ બીજી સફળતા મળી છે.