પાસપોર્ટ ઓફિસને બોમ્બથી ઉડાવી દેવાનો ઈમેઈલ મળતા પોલીસ દ્વારા ચેકીંગ
(પ્રતિનિધિ) ભરૂચ, ભરૂચ સહિત સમગ્ર ગુજરાતની પાસપોર્ટ કચેરીઓને આરડીએક્સથી ઉડાવી દેવાની ધમકીભર્યો ઈ-મેઈલ મળતા સુરક્ષા તંત્ર સચેત બની ગયું હતું.ભરૂચ શહેરની હેડ પોસ્ટ ઓફિસ ખાતે આવેલી પાસપોર્ટ કચેરીને પણ સમાન ઈ-મેઇલ મળતા અફરાતફરીનો માહોલ સર્જાયો હતો.
મળતી માહિતી મુજબ ધમકીભર્યો ઈ-મેઈલ હેડ પોસ્ટ ઓફિસના સુપરિટેન્ડન્ટના અધિકૃત ઈ-મેઈલ આઈડી પર પ્રાપ્ત થયો હતો.ઈ-મેઈલ મળતા જ કચેરીમાં કામગીરી કરતા અધિકારીઓ અને કર્મચારીઓમાં ભયનો માહોલ ફેલાયો હતો.તાત્કાલિક સુરક્ષાના પગલાં રૂપે કચેરી ખાલી કરાવી તમામ કર્મચારીઓ તથા હાજર અરજદારોને બહાર કાઢવામાં આવ્યા હતા.
ઘટનાની જાણ થતાં જ બી-ડિવિઝન પોલીસ,એસઓજી તથા અન્ય પોલીસ અધિકારીઓ અને સ્ટાફ સ્થળ પર દોડી આવ્યો હતો.ત્યાર બાદ બોમ્બ સ્ક્વોડ અને ડોગ સ્ક્વોડની ટીમે કચેરી તેમજ આસપાસના વિસ્તારમાં સઘન તપાસ હાથ ધરી હતી.આ સમગ્ર પ્રકરણમાં ધમકીભર્યો ઈ-મેઈલ કોણે અને કયા સ્થળેથી મોકલ્યો તેની દિશામાં સાયબર ક્રાઈમ શાખાએ તપાસ શરૂ કરી છે.
ઉલ્લેખનીય છે કે અગાઉ પણ ભરૂચ જિલ્લા કલેક્ટર કચેરી અને કોર્ટ કચેરીને ધમકી મળવાના બનાવો સામે આવ્યા હતા.હાલની ઘટનાના કારણે પાસપોર્ટ માટે પૂર્વનિયોજિત એપોઈન્ટમેન્ટ ધરાવતા વિવિધ જિલ્લાઓ માંથી આવેલા અરજદારો અટવાઈ ગયા હતા.
આગળ શનિવાર અને રવિવારની રજાઓ હોવાને કારણે અરજદારોને ભારે અસુવિધાનો સામનો કરવો પડ્યો હતો. પોલીસ તંત્ર દ્વારા સઘન તપાસ ચાલુ રાખવામાં આવી છે અને પ્રાથમિક તપાસમાં કોઈ શંકાસ્પદ વસ્તુ મળી ન હોવાનું સૂત્રો જણાવી રહ્યા છે.
