૩૫ વર્ષ જૂની હત્યામાં મૃતદેહ શોધવા ક્રાઈમ બ્રાન્ચે ખોદકામ કરાવ્યું
‘શબનમ’નું હાડપિંજર શોધવા ક્રાઈમ બ્રાન્ચની કવાયત તેજ
અમદાવાદ, વટવાના કુતુબનગરમાં ક્રાઈમ બ્રાન્ચ દ્વારા જે ખોદકામ ચાલી રહ્યું છે, તેમાં એક પછી એક ચોંકાવનારા રહસ્યો બહાર આવી રહ્યા છે. ૧૯૯૨માં રહસ્યમય રીતે ગુમ થયેલી ફરઝાના ઉર્ફે શબ્નમ નામની યુવતીની તેના જ પ્રેમીએ હત્યા કરી હોવાની આશંકા પ્રબળ બની છે.
ક્રાઈમ બ્રાન્ચની પ્રાથમિક તપાસમાં સામે આવ્યું છે કે, આ હત્યા પાછળ ‘ક્રાઈમ ઓફ પેશન’ એટલે કે પ્રેમ સંબંધ કારણભૂત હતો. આ કેસનો મુખ્ય આરોપી શમશુદ્દીન હોવાનું મનાય છે, જેની સાથે ફરઝાનાને લગ્નેતર સંબંધો હતા.
અંગત વિવાદ અને તકરાર વધતા શમશુદ્દીને ફરઝાનાની હત્યા કરી નાખી હતી. ગુનાના પુરાવાનો નાશ કરવા માટે તેણે લાશને પોતાના જ ઘરના કૂવામાં દાટી દીધી હતી. આ કેસમાં સૌથી મોટી મુશ્કેલી એ છે કે, મુખ્ય આરોપી શમશુદ્દીન પણ હવે આ દુનિયામાં નથી. જોકે, ક્રાઈમ બ્રાન્ચ હાલ તેવા શખ્સોની પૂછપરછ કરી રહી છે જેમણે લાશને છુપાવવામાં શમશુદ્દીનની મદદ કરી હોય અથવા જેઓ આ ઘટનાના પ્રત્યક્ષદર્શી હોય.
હાલ તો ક્રાઇમબ્રાંચે અટપટા કેસની તપાસ શરૂ કરતા સમગ્ર વટવામાં ભારે કુતુહલ વ્યાપ્યું છે. આટલા વર્ષો સુધી આ રહસ્ય અકબંધ રહ્યું હોત, જો શમશુદ્દીનના પરિવારને ફરઝાનાના ભાસ ન થયા હોત. પરિવારજનોએ દાવો કર્યો હતો કે, તેમને વારંવાર મૃતક યુવતી દેખાય છે અને તેઓ ભારે માનસિક તણાવમાં જીવી રહ્યા હતા.
આ ભયના કારણે જ તેમણે તાંત્રિક વિધિઓનો સહારો લીધો અને અંતે આ રહસ્ય પોલીસ સુધી પહોંચ્યું. હાલમાં ક્રાઈમ બ્રાન્ચ કેટલાક સહ-આરોપીઓ અને સાક્ષીઓની પૂછપરછ કરી રહી છે. વટવા ખાતે જમીનમાં દટાયેલા અવશેષો મળી આવે તો ફોરેન્સિક તપાસ દ્વારા ફરઝાનાની ઓળખ કરવામાં આવશે. ૩૪ વર્ષ જૂના આ કેસે ફરી એકવાર સાબિત કર્યું છે કે કાયદાના હાથ ગમે તેટલા લાંબા હોય, પણ કુદરતનો ન્યાય તેનાથી પણ અનોખો હોય છે.
