બદલી માટે માંદગીનું સર્ટિ. રજૂ કરનાર દંપતી ઝડપાયું
ભાવનગર, પોતાના વતનમાં બદલી કરાવવા માટે કિડનીની ગંભીર બીમારીનું ખોટું સર્ટિફિકેટ રજૂ કરનારા શિક્ષક દંપતીની પોલ ચાર વર્ષ બાદ પકડાઈ ગઈ છે. આ શિક્ષક દંપતી પાલિતાણા તાલુકાની જામવાળી-૨ પ્રાથમિક શાળામાં ફરજ બજાવતું હતું. સરકારી શાળામાં શિક્ષક તરીકે ફરજ બજાવતા અલ્કા જોષી અને તેમના પતિ મુકેશ ગોરે ચાર વર્ષ પહેલા પોતાના વતનના સ્થળે જિલ્લાફેર બદલી માટે ખાટે ખાસ કિસ્સામાં પોતાને લાભ આપવા માટે અરજી કરી હતી. જેમાં અલ્પા જોષીએ પોતાને અને કુટુંબના સભ્યોને કિડનીની અસાધ્ય બીમારી હોવાનું જણાવ્યું હતું.
એક તરફ, પત્નીએ પોતાને કિડનીની બીમારી હોવાનું કારણ દર્શાવ્યું હતું, તો પતિએ પણ પોતે પત્નીનું ધ્યાન રાખી શકે તે માટે ફેરબદલીનો લાભ આપવા માટે અરજી કરી હતી. આ અરજી જુલાઈ ૨૦૧૬માં કરાઈ હતી, અને તેને ગાંધીનગર મોકલી અપાઈ હતી. અરજકર્તા પતિ-પત્નીએ અરજી સાથે અમદાવાદની કિડની ડિસીસ એન્ડ રિસર્ચ સેન્ટરનું સર્ટિફિકેટ પણ જોડ્યું હતું. આ મામલે શિક્ષણ વિભાગ દ્વારા કિડની હોસ્પિટલમાં તપાસ કરવામાં આવી હતી. જોકે, હોસ્પિટલ દ્વારા આવું કોઈ પ્રમાણપત્ર અપાતું ના હોવાનું કહેવાતા દંપતીએ રજૂ કરેલું સર્ટિ ખોટું હોવાનું બહાર આવ્યું હતું.
શિક્ષક દંપતીએ બદલી કરાવવા માટે રચેલા તરકટનો પર્દાફાશ થતાં આ મામલે પાલિતાણા તાલુકાના ઈન્ચાર્જ પ્રાથમિક શિક્ષણાધિકારી દ્વારા બંને વિરુદ્ધ પાલિતાણા ટાઉન પોલીસ સ્ટેશનમાં ફરિયાદ નોંધાવાઈ છે. શિક્ષક દંપતી સામે કલમ ૪૬૫, ૪૬૮, ૪૭૧, ૧૨૦ બી હેઠળ ગુનો નોંધી વધુ તપાસ હાથ ધરવામાં આવી છે.SSS
