કોરોના રસીકરણ ઝૂંબેશ ગુરુવારથી ફરી શરુ કરાશે
વાવાઝોડાની પ્રવર્તમાન પરિસ્થિતિને ધ્યાનમાં રાખતા સરકારે વધુ એક દિવસ રસીકરણ બંધ રાખવાનો ર્નિણય
અમદાવાદ: ગુજરાતમાં હાલમાં તૌકતે વાવાઝોડુ કહેર વર્તાઈ રહ્યું છે. રાજ્યના મોટા ભાગમાં તેની અસર વર્તાઈ રહી છે અને ભારે પવન સાથે વરસાદ પડ્યો છે. પ્રવર્તમાન વાવાઝોડા અને વરસાદની પરિસ્થિતિમાં આરોગ્ય તંત્ર સ્ટેન્ડ બાય હોવાના કારણે સમગ્ર રાજ્યમાં કોરોનાની રસીકરણની કામગીરી બુધવારે પણ સ્થગિત રાખવાનો ર્નિણય કરવામાં આવ્યો છે. હવે રાજ્યમાં રસીકરણની કામગીરી ૨૦ મે ગુરૂવારથી ફરીથી શરૂ કરવામાં આવશે. અગાઉ તૌકતે વાવાઝોડાના કારણે રાજ્યમાં બે દિવસ સુધી રસીકરણની કામગીરી બંધ રાખવામાં આવી હતી.
રાજ્યમાં સોમવાર અને મંગળવારે રસીકરણ બંધ રાખવામાં આવી હતી. જેમાં હવે વધુ એક દિવસનો ઉમેરો કરવામાં આવ્યો છે. નોંધનીય છે કે વાવાઝોડાની પ્રવર્તમાન સ્થિતિના કારણે જ રાજ્યના ૩૬ શહેરોમાં રાત્રિ કર્ફ્યૂ અને લગાવવામાં આવેલા નિયંત્રણો વધુ ત્રણ દિવસ સુધી લંબાવવાનો ર્નિણય કરવામાં આવ્યો છે. સોમવારે મુખ્યમંત્રી વિજય રૂપાણીએ વાવાઝોડાની સમીક્ષા બેઠક દરમિયાન આ ર્નિણય લીધો હતો. હવે ૮ મહાનગર સહિત ૩૬ શહેરોમાં ૨૧ મે સવારે છ વાગ્યા સુધી રાત્રિ કર્ફ્યૂ અને નિયંત્રણો અમલી રહેશે. તૌકતે વાવાઝોડાએ ગુજરાતમાં તબાહી મચાવી છે. મુખ્યમંત્રી વિજય રૂપાણીએ તૌકતે વાવાઝોડાની સ્થિતિ અંગે માહિતી આપતાં જણાવ્યું હતું કે, તૌકતે વાવાઝોડાની અસરથી ૨૪૩૭ ગામોમાં વીજ પુરવઠો ખોરવાયો છે
જેમાંથી ૪૮૪થી વધુ પુરવઠો પુનઃએકવાર શરૂ કરાયો. આ વિસ્તારમાં અંદાજે ૧૫૯ રસ્તાઓ બંધ છે, જેને ખોલવાની કામગીરી ચાલુ છે. ઉપરાંત વાવાઝોડાના કારણે અંદાજે ૪૦૦૦૦ વૃક્ષો ધરાશાયી થયા છે. જ્યારે ૧૬,૫૦૦ જેટલા કાચા મકાનો-ઝૂંપડાને નુકસાન પહોંચ્યું છે. હજી પણ રાહત અને બચાવની કામગીરી ચાલુ છે.
રાજ્યના અધિક મુખ્ય સચિવ પંકજ કુમારે વાવાઝોડા અંગે અપડેટ આપતાં જણાવ્યું હતું કે, ગઇકાલે રાત્રે ગુજરાતમાં પ્રવેશેલું વાવાઝોડું ધીમું પડી રહ્યુ છે. ગઈકાલે ૧૬૦ની ગતિએ ત્રાટકેલા વાવાઝોડાની સ્પીડ હવે ૧૦૦ની થઈ ગઈ છે. આ વાવાઝોડું મંગળવારે બપોર સુધીમાં અમદાવાદ થઈને ઉત્તર ગુજરાત તરફ આગળ વધી રહ્યું છે. આ દરમિયાન ભારે વરસાદ પડી શકે છે. જાે કે, આજે મધરાત બાદ કાલે વહેલી સવાર પછી વાવાઝોડું ગુજરાત છોડી રાજસ્થાન તરફ જશે તેવી શક્યતા છે.
