અમેરિકા જતાં મહેસાણાના યુવકને મેક્સિકોમાં બંધક બનાવ્યો
મહેસાણાના યુવાનનું અમેરિકા જવાનું સપનું દુઃસ્વપ્ન બન્યું-યુવકને પરિવારની સાથે મેક્સિકોમાં બંધક બનાવાયો
બાકીના ૫૦ લાખની ઊઘરાણી માટે પરિવારને બંધક બનાવાયો પણ યુવકની આજીજી બાદ પરિવારને છોડાયો
અમદાવાદ, પરિવાર સાથે અમેરિકા જવાનું લાંબા સમયથી સપનું જાેઈ રહેલા મહેસાણાના પ્રિયંક પટેલને એ વાતની કલ્પના પણ નહોતી કે તેનું આ સપનું આખી જિંદગી ના ભૂલાય તેવું દુઃસ્વપ્ન બની રહેવાનું છે. પ્રિયંકે એક એજન્ટ સાથે પત્ની અને ત્રણ બાળકો સહિત કુલ પાંચ લોકોને ગેરકાયદે રીતે અમેરિકા પહોંચાડવા દોઢ કરોડ રુપિયામાં સોદો કર્યો હતો.
જેમાંથી તેણે ૧ કરોડ રુપિયા ચૂકવી પણ દીધાહતા. જાેકે, મેક્સિકો પહોંચ્યા બાદ બાકીના ૫૦ લાખની વ્યવસ્થા ના થઈ શકતા એજન્ટોએ આખા પરિવારને બંધક બનાવી લીધું હતું. પ્રિયંકની વિનંતી પર તેની પત્ની અને ત્રણ બાળકોને છોડી દેવાયા હતા, પરંતુ બાકીના રુપિયા કઢાવવા એજન્ટોએ પ્રિયંકને પોતાની પાસે રાખીને ઢોર માર મારતા તેને બ્રેઈન સ્ટ્રોક આવી જતાં હાલ તેને મેક્સિકોની એક પ્રાઈવેટ હોસ્પિટલમાં દાખલ કરાયો છે.
પ્રાપ્ત વિગતો અનુસાર, પ્રિયંક પટેલને એજન્ટોએ એવું કહ્યું હતું કે તેની પત્ની અને ૧૨, ૭ તેમજ પાંચ વર્ષના ત્રણ બાળકોને બોર્ડર ક્રોસ કરાવીને ટેક્સાસ મોકલી દેવાયા છે. પરંતુ એજન્ટોના કબજામાં રહેલા પ્રિયંકની તેના પરિવારજનો સાથે કોઈ વાતચીત નહોતી થઈ શકી.
આગળ કંઈ થાય તે પહેલા એજન્ટોના ઢોર મારથી બ્રેઈન સ્ટ્રોક આવી જતાં પ્રિયંકની સ્થિતિ હાલ ગંભીર હોવાનું માનવામાં આવી રહ્યું છે. વળી, તે ડાયાબિટિક હોવાથી તેની તબિયત વધુ લથડી છે. હાલ તે મેક્સિકોના કાંકુન સિટીની એક હોસ્પિટલમાં સારવાર લઈ રહ્યો છે.
૩૪ વર્ષનો પ્રિયંક, તેની ૩૨ વર્ષીય પત્ની ઉમા અને ત્રણ બાળકો મહેસાણાના સાલડી ગામેથી જાન્યુઆરી મહિનામાં નીકળ્યા હતા. આ જ સમયે કેનેડા બોર્ડર પર થીજીને મોતને ભેટેલો ડીંગુચાનો પરિવાર પણ અમેરિકા જવા નીકળ્યો હતો. પોલીસ સૂત્રોનું માનીએ તો, ગામડેથી નીકળ્યા બાદ પ્રિયંક તેના પરિવાર સાથે અમદાવાદના ઘાટલોડિયા વિસ્તારમાં થોડો સમય એક ફ્લેટમાં ભાડે રહ્યો હતો.
એજન્ટોએ બનાવેલા પ્લાન અનુસાર, પહેલા આખા પરિવારને દિલ્હી લઈ જવાયો હતો જ્યાંથી તેમને મેક્સિકો પહોંચાડાયા હતા. સૂત્રોનું માનીએ તો, પ્રિયંકે અમદાવાદના ચંદ્રેશ પટેલ અને પલિયડના લખુ પટેલને દોઢ કરોડમાં પોતાના પરિવારને અમેરિકા પહોંચાડવાનું કામ આપ્યું હતું. આંગડિયા દ્વારા ૧ કરોડ રુપિયા એજન્ટોને ચૂકવી પણ દેવામાં આવ્યા હતા.
જાેકે, મેક્સિકોના કાંકુન પહોંચ્યા બાદ બાકીના ૫૦ લાખ ના મળતા એજન્ટોએ પોતાનું અસલ સ્વરુપ ઉજાગર કર્યું હતું. ગુજરાતના એજન્ટોના કહેવા પર મેક્સિકોના એજન્ટોએ (જેમને ઉત્તર ગુજરાતમાં મેકલા તરીકે પણ ઓળખવામાં આવે છે) પ્રિયંકના આખા પરિવારને બંધક બનાવી ૫૦ લાખની ઉઘરાણી શરુ કરી હતી.
એક અઠવાડિયા સુધી તેમણે આ પરિવારને ટોર્ચર કર્યો હતો, બાદમાં પ્રિયંકની આજીજી પર તેની પત્ની અને બાળકોને છોડવામાં આવ્યાં હતાં. એજન્ટોએ પ્રિયંકને એવી માહિતી આપી હતી કે તેની પત્ની ઉમા અને ત્રણ બાળકોને ટેક્સાસ મોકલી દેવાયા છે, અને આ જ વાત પ્રિયંકના પરિવારજનોને પણ જણાવી દેવાઈ હતી.
બીજી તરફ, પ્રિયંક પાસેથી ૫૦ લાખ કઢાવવા માટે એજન્ટોએ તેને મહિનાઓ સુધી સુધી ટોર્ચર કર્યો હતો. આખરે જૂનના છેલ્લા સપ્તાહમાં પ્રિયંકની હાલત બગડી હતી અને તેને બ્રેઈન સ્ટ્રોક આવી ગયો હતો.
ડાયાબિટિક હોવાના કારણે પ્રિયંકની સ્થિતિ ક્રિટિકલ બની જતાં તેને કાંકુનની એક પ્રાઈવેટ હોસ્પિટલમાં દાખલ કરાયો હતો. પોલીસ સૂત્રોનું માનીએ તો હાલ પ્રિયંક ખૂબ જ ગંભીર છે. સાલડી ગામના સરપંચ ગેમર ઠાકોરનું કહેવું છે કે, પ્રિયંક અને તેનો પરિવાર એજન્ટો મારફતે અમેરિકા જવા નીકળ્યો હતો. તેઓ આઠ મહિના પહેલા જ ગામ છોડી ચૂક્યા છે, પરંતુ ત્યારબાદ શું થયું તેની કોઈને જાણ નથી. તેમના સમાજના લોકો એવું કહે છે કે પ્રિયંકની તબિયત લથડતા પરિવાર અમેરિકા નથી પહોંચી શક્યો.
