ઓઢવમાં લગ્ન માટે દબાણ કરતા યુવક સામે યુવતીની દુષ્કર્મની ફરિયાદ
અમદાવાદ, ઓઢવમાં પરિવાર સાથે રહેતી યુવતીને તેના વિસ્તારમાં રહેતા યુવક સાથે પ્રેમસંબંધ બંધાયો હતો. યુવક યુવતીને લગ્ન કરવા દબાણ કર્યા કરતો હતો. આ સમયે યુવતીની સહમતીથી એક વખત શારીરિક સંબંધ બાંધ્યો હતો.
ત્યારબાદ યુવતીને લગ્ન નહીં કરે તો સમાજમાં તારી બદનામી કરીશ કહીને બળજબરીપૂર્વક યુવતી સાથે સંબંધ કેળવ્યો હતો. યુવતી ઘરમાં ગુમસૂમ બેસી રહેતા માતાએ પૂછતા તમામ હકીકત જણાવી દીધી હતી. બાદમાં યુવતીએ આ મામલે ઓઢવ પોલીસ સ્ટેશનમાં દુષ્કર્મની ફરિયાદ નોંધાવી છે.ઓઢવમાં રહેતી ૨૨ વર્ષીય યુવતી સંયુક્ત કુટુંબમાં રહે છે.
વર્ષ અગાઉ યુવતીના વિસ્તારમાં યુવક ભાડેથી રહેવા આવ્યો હતો. યુવતીની માતા ટિફિન સર્વિસ કરતી હોવાથી યુવકના ઘરે ટિફિન આપવા યુવતી આવતી જતી હતી.
આ દરમિયાન બંને વચ્ચે મિત્રતા બાદ પ્રેમસંબંધ બંધાયો હતો. ગત ડિસેમ્બરમાં યુવતીના ઘરે કોઈ હાજર ન હતું ત્યારે યુવક તેના ઘરે આવીને શારીરિક સંબંધ બાંધ્યો હતો બાદમાં લગ્ન માટે અવારનવાર દબાણ કરતો રહેતો હતો પરંતુ યુવતી ઈનકાર કરતી હતી.
તેથી યુવકે તેને સમાજમાં બદનામ કરી નાખશે તથા તેના માતાપિતા અને ભાઈને મારી નાખવાની ધમકી આપીને ઘણી વખત બળજબરીપૂર્વક યુવતી સાથે સંબંધ બાંધ્યો હતો. ઉપરાંત આ મામલે કોઈને જાણ કરીશ તો સમગ્ર પરિવારને જાનથી મારી નાખવાની ધમકી આપી હતી.
તેથી યુવતી ગભરાઈને ઘરમાં ગુમસૂમ બેસી રહેતી હતી. યુવતીની માતાએ સાંત્વના આપીને પૂછ્યું ત્યારે તમામ હકીકત માતાને જણાવી હતી. આ મામલે યુવતીએ અમિત પ્રજાપતિ નામના યુવક વિરુદ્ધ ઓઢવ પોલીસ સ્ટેશનમાં ફરિયાદ નોંધાવતા પોલીસે યુવક વિરુદ્ધ દુષ્કર્મનો ગુનો નોંધીને તપાસ શરૂ કરી છે.SS1MS
