‘હર ઘર સ્વદેશી’ થીમ સાથેની આ પહેલ MSMEs અને સ્ટાર્ટઅપ્સને વૈશ્વિક પ્લેટફોર્મ પૂરું પાડી રહી છે

વાઈબ્રન્ટ ગુજરાત રિજનલ કોન્ફરન્સ દ્વારા ‘વિકસિત ગુજરાતથી વિકસિત ભારત@૨૦૪૭‘ના વિઝનને વેગ મળશે: ઉદ્યોગ રાજ્ય મંત્રી ડૉ. જયરામ ગામીત

વિધાનસભા ખાતે ધારાસભ્ય શ્રી દિવ્યેશ અકબરી દ્વારા રજૂ કરવામાં આવેલો  રિજનલ વાઇબ્રન્ટ ગુજરાત  બિનસરકારી સંકલ્પ સ્વીકારાયો

વિધાનસભા ગૃહ ખાતે બિનસરકારી સંકલ્પના પ્રત્યુત્તરમાં ઉદ્યોગ રાજ્ય મંત્રી ડૉ. જયરામ ગામીતે જણાવ્યું કે, વડાપ્રધાન શ્રી નરેન્દ્રભાઈ મોદીએ વર્ષ ૨૦૦૩માં વાઈબ્રન્ટ ગુજરાતના જે બીજ રોપ્યા હતા, તેને મુખ્યમંત્રી શ્રી ભૂપેન્દ્ર પટેલ અને નાયબ મુખ્યમંત્રી શ્રી હર્ષ સંઘવીના સક્ષમ નેતૃત્વ હેઠળ નવી ઊંચાઈ આપવામાં આવી રહી છે.

ડૉ. ગામીતે કહ્યું કે, મુખ્યમંત્રીશ્રીના નેતૃત્વમાં રાજ્ય સરકારે વાઈબ્રન્ટ ગુજરાતની સફળતાને છેવાડાના વિસ્તારો સુધી પહોંચાડવા ‘વાઈબ્રન્ટ ગુજરાત રીજનલ કોન્ફરન્સ’ (VGRC)નું આયોજન કર્યું છે. જે ગુજરાતને ખરા અર્થમાં ‘ગેટવે ટુ ધ ફ્યુચર’ તરીકે દેશ-દુનિયા પ્રસ્થાપિત કરી રહ્યું છે.

મંત્રીશ્રીએ કહ્યું કે, ઓગસ્ટ, ૨૦૨૫માં અમદાવાદ ખાતે મુખ્યમંત્રીશ્રીએ VGRCના લોગો, વેબસાઈટ અને એપ લોન્ચ કરી હતી. આ સંદર્ભે દિલ્હી ખાતે યોજાયેલા કર્ટન રેઝરમાં ૨૦૦થી વધુ ઉદ્યોગપતિઓ અને ૨૯ વિદેશી રાજદ્વારીઓની હાજરીમાં રોકાણની તકો પર વિસ્તૃત ચર્ચા થઈ હતી.

પ્રાદેશિક કોન્ફરન્સની પ્રથમ કડીરૂપે આયોજિત મહેસાણાની ગણપત યુનિવર્સિટી ખાતેની VGRCની ૮૦ હજાર લોકોએ મુલાકાત લીધી હતી. જ્યાં ઉત્તર ગુજરાતમાં ૭૦૦ એકરમાં ચાર નવા GIDC એસ્ટેટની જાહેરાત કરવામાં આવી હતી.

જ્યારે રાજકોટ ખાતેની કોન્ફરન્સનો વડાપ્રધાન શ્રી નરેન્દ્રભાઈ મોદીની પ્રેરક ઉપસ્થિતિમાં પ્રારંભ કરાયો હતો. જેમાં અંદાજે ૧.૨૦ લાખ મુલાકાતીઓ જોડાયા હતા. અહીં ૩,૫૪૩ એકરમાં ૧૩ નવી GIDC એસ્ટેટ અને રાજકોટમાં મેડિકલ ડિવાઈસ પાર્કનું ઉદ્ઘાટન કરવામાં આવ્યું હતું.

આગામી આયોજનની રૂપરેખા આપતાં મંત્રીશ્રીએ જણાવ્યું કે, પ્રાદેશિક વિકાસને વેગ આપવા હવે એપ્રિલ ૨૦૨૬માં સુરત (દક્ષિણ ગુજરાત) અને જૂન ૨૦૨૬માં વડોદરા (મધ્ય ગુજરાત) ખાતે કોન્ફરન્સ યોજાશે.

‘હર ઘર સ્વદેશી’ની થીમ સાથે આયોજિત આ પહેલ MSMEs અને સ્ટાર્ટઅપ્સને વૈશ્વિક પ્લેટફોર્મ પૂરું પાડી રહી હોવાનું મંત્રીશ્રીએ જણાવ્યું હતું. આમ, વિધાનસભા ખાતે ધારાસભ્ય શ્રી દિવ્યેશ અકબરી દ્વારા રજૂ કરવામાં આવેલો રિજનલ વાઇબ્રન્ટ ગુજરાત  બિનસરકારી સંકલ્પ સ્વીકાર કરવામાં આવ્યો હતો.