ટ્રમ્પ તંત્રે બાઈડનની ટીમને ચાવી આપવાનો ઈનકાર કર્યો
વોશિંગ્ટન: અમરિકામાં પ્રેસિડન્ટની ચૂંટણી બાદ સત્તા હસ્તાંતરણનો મામલો ગૂંચવાઈ ગયો છે. ડોનાલ્ડ ટ્રમ્પ એડમિનિસ્ટ્રેશને તો ઈલેક્ટેડ પ્રેસિડન્ટ જો બાઈડનની ટ્રાન્જિશન ટીમ (એ ટીમ જે હવેતી જાન્યુઆરી ૨૦૨૧ સુધી ટ્રમ્પ પ્રેસિડન્ટ રહેશે ત્યાં સુધી મહત્વની નીતિઓ પર કામ કરશે)ને ફેડરલ સરકારની ચાવીઓ સોંપવાનો ઈનકાર કરી દીધો છે. પ્રેસિડન્ટ ટ્રમ્પ સતત ચૂંટણીમાં ગરબડ થયાનો આરોપ લગાવી રહ્યા છે. બીજી તરફ તેમની જ રિપબ્લિક પાર્ટીમાં તેમના આ વલણને લઈને મતભેદ વધી ગયા છે.
હકીકતમાં અમેરિકાના પ્રેસિડન્ટની ચૂંટણીમાં જો સરકાર બદલાય છે, તો જીત મેળવનાર ટ્રાન્જિશન ટીમ બનાવે છે. એ ટ્રાન્જિસ્ટ ટીમને ફેડરલ ગવર્મેન્ટની દરેક બિલ્ડિંગ, દરેક ઓફિસમાં સ્થાન આપવામાં આવે છે, જ્યાં તે આગામી સરકાર ચલાવવા માટે જરૂરી તૈયારી કરે છે. તેના માટે બજેટ પણ આપવામાં આવે છે, જે આ વખતે લગભગ ૧ કરોડ ડોલરની આસપાસ હશે. સોમવારે બાઈડનની ટ્રાન્જિશન ટીમ તેના માટે જનરલ સર્વિસીઝ એડમિનિસ્ટ્રેશનના ચીફ પાસે ‘ટ્રાન્જિશન’ લેટર પર સહી કરાવવા પહોંચી,
પરંતુ તેમણે સહી કરવાનો ઈનકાર કરી દીધો. હકીકતમાં, પ્રેસિડન્ટ ડોનાલ્ડ ટ્રમ્પે બાઈડનની જીતને સ્વીકાર નથી કરી. એ જ કારણ છે કે, જનરલ સર્વિસીઝ એડમિનિસ્ટ્રેશનના ચીફ એમિલી મર્ફી વ્હાઈટ હાઉસની લીલી ઝંડી વિના ટ્રાન્જિશન લેટર પર સહી નથી કરવા ઈચ્છતા. તેમની નિમણૂક ટ્રમ્પે જ કરી હતી. બાઈડનની ટ્રાન્જિશન ટીમ અત્યારથી જ એક્શનમાં આવી ચૂકી છે. કોરોના વાયરસ મહામારીનો સામનો કરવા માટે ઈન્ડિયન-અમેરિકન વિવેક મૂર્તિની સહ-અધ્યક્ષતામાં ટાસ્ક ફોર્સ પણ બનાવી દેવાઈ છે.
બીજી તરફ પ્રેસિડન્ટ ડોનાલ્ડ ટ્રમ્પ સતત ચૂંટણીના પરિણામો સામે સવાલ ઉઠાવી રહ્યા છે અને વાઈડન-હેરિસની જીત બતાવવા માટે મીડિયાની ટીકા કરી રહ્યા છે. ટ્રમ્પ ભલે બાઈડનની જીતને સ્વીકાર ન કરતા હોય, પરંતુ તેમની જ રિપબ્લિક પાર્ટીના કેટલાક જૂના દિગ્ગજ નેતાઓ ડેમોક્રેટ ઉમેદવારને વિજેતા જણાવી રહ્યા છે અને ઈશારા-ઈશારામાં ટ્રમ્પને એ વાતને સ્વીકારી લેવા અપીલ કરી રહ્યા છે. અમેરિકાના પૂર્વ પ્રેસિડન્ટ જોર્જ બુશે એક સ્ટેટમેન્ટ રિલીઝ કરી કહ્યું કે, મેં હમણાં જ પ્રેસિડન્ટ-ઈલેક્ટ જો બાઈડન સાથે વાત કરી. મેં તેમને અભિનંદન આપ્યા છે અને ગત રાત્રે તેમની તરફથી અપાયેલા દેશભક્તિથી ભરેલા સંદેશ માટે તેમનો આભાર માન્યો છે.
ભલે અમારી વચ્ચે રાજકીય મતભેદ હોય, પરંતુ હું જો બાઈડનને એક સારા વ્યક્તિ તરીકે જાણું છું, જેમને આ તક દેશને એકજૂથ કરવા અને આગળ વધારવા માટે મળી છે. ખાસ વાત એ છે કે, અમેરિકના બધા ૪ જીવિત પૂર્વ પ્રેસિડન્ટ્સ- જોર્જ બુશ, જિમી કાર્ટર, બિલ ક્લિન્ટન અને બરાક ઓબામાએ બાઈટનને વિજેતા તરીકે માન્યતા આપી દીધી છે. બુશને છોડીને બાકીના ૩ પૂર્વ પ્રેસિડન્ટ બાઈડનની પાર્ટી ડેમોક્રેટિકના જ છે. કહેવાઈ તો એવું પણ રહ્યું છે કે, ચૂંટણીના પરિણામોને લઈને ટ્રમ્પના પરિવારમાં જ ભાગલા છે. કેટલાક રિપોર્ટસ મુજબ, ટ્રમ્પના જમાઈ જેરેડ કુશનરે તેમને હાર સ્વીકારી લેવાની સલાહ આપી છે.
એવું પણ કહેવાઈ રહ્યું છે કે, ફર્સ્ટ લેડી મેલાનિયા ટ્રમ્પે પણ ડોનાલ્ડ ટ્રમ્પને હાર કબૂલવાની અપી કરી છે, પરંતુ તેમણે ટ્વીટ કરી પતિનો સાથ આપ્યો છે અને તેમની જ વાતનું પુનરોચ્ચાર કર્યો છે કે માત્ર લીગલ વોટ ગણાવા જોઈએ, ઈલીગલ વોટ નહીં. હકીકતમાં, ટ્રમ્પ પોસ્ટલ બેલેટ સામે સવાલ ઉઠાવી રહ્યા છે. ચૂંટણી પ્રચાર દરમિયાન પણ તેઓ પોસ્ટલ બેલેટની ટીકા કરી રહ્યા હતા.
